မုန့်မလုပ်ဖြစ်တဲ့အခါ

ဟုတ်ပါတယ် မုန့်မလုပ်ဖြစ်တဲအခါတွေကျရင် Crochet ထိုးပါတယ်။ တကယ်တော့ Crochet နဲ့အဆက်ပြတ်နေတာ ၁၀နှစ်ကျော်ကျော်လောက်ရှိပါပြီ။ Singapore စရောက်ကတည်းကဆိုပါတော့။ ပြီးခဲ့တဲ့ ၁၀ နှစ်တောက်လျောက်လုံးမှာ ကျောင်းစာတွေ၊ အလုပ်တွေနဲ့ ရှုပ်နေလိုက်တာ အဲဒီ Crochet ဆီကိုလုံးဝ မလှည့်ဖြစ်ပါဘူး။ ပြီးတော့ အားတဲ့အချိန်တွေမှာလည်း မလုပ်ဖြစ်တော့ပါဘူး။ ခုကျောင်းတွေ လုံးဝပြီးသွားတဲ့အချိန်၊ လုပ်စရာကိစ္စတွေတော်တော်များများ ပြီးသွားတဲ့ အချိန်မှာ အားချိန်ကလေးတွေထွက်လာပါတယ် ။ (ဒါကြောင့်လည်း မုန့်ဖုတ်တဲ့ ဘက်ကိုရောက်သွားတာပါ) အဲဒီအချိန်မှာ Crochet ကို ပြန်ပြီးထိုးချင်စိတ်ကလေးဝင်လာပါတယ်။

ပြောရဦးမယ်။ Crochet ထိုးတာကိုဘယ်တုန်းကစထိုးတာလဲဆိုတာ။ ယုံချင်မှယုံမှာ ငယ်ငယ် ၈ နှစ်သမီးထဲကစပြီးထိုးတာပါ။ ဟုတ်ပါတယ် ၈ နှစ်ပါ။ သူများတွေကစားနေတဲ့အချိန်မှာ Crochet အထိုးကျင့်နေခဲ့တာပါ။ စထိုးတုန်းက အပ်တောင်သေသေချာချာမရှိပါဘူး။ ၀ါးဒုတ် ကလေးကို အဖျားမှာအကောက်လေးဖြစ်အောင် လုပ်ပြီး အထိုးသင်တာပါ။ အဲဒီတုန်းက အဖေတာဝန်ကျရာ ရခိုင်ပြည်နယ် ကျောက်ဖြူမှာဆိုတော့ ပစ္စည်းကလည်း ၀ယ်ချင်သလို အလွယ်တကူမရပါဘူး။ ၈၈ နှစ်ပတ်ဝန်းကျင်လောက်ဖြစ်မယ်ထင်ပါတယ်။ အဲဒီမှာကျောင်းပိတ်တုန်း ဆေးရုံက Nurse တွေဆီသွားလည်ရင်းနဲ့ သူတို့ထိုးတာတွေ့တာနဲ့ရောဂါစတက်တော့တာပါပဲ။ (ငယ်ငယ်တုန်းကတည်းက လူကြီးအလုပ်တွေအင်မတန်ဝါသနာပါပါတယ်) အဲဒါနဲ့ ဆေးရုံကို နေ့တိုင်းရောက်တော့တာပါဘဲ။ သူတို့နားချိန်မှာသွားသွားသင်တာလေ။ အိမ်ကလည်း ဆေးရုံဝင်းထဲမှာဆိုတော့ ၅ မိနစ်လောက်လမ်းလျောက်တယ်ဆိုရင်ရောက်တာပါဘဲ။


အဲဒီတုန်းကတော့သိုးမွှေးချည်ကလည်းမပေါပါဘူး။ သိုးမွှေးအင်္ကျီ အဟောင်းတွေကိုဖျက်ပြီးပြန်ထိုးရတာမှတ်မိပါသေးတယ်။ အဲလိုနဲ့ နဲနဲသေချာထိုးတတ်လာတဲ့အချိန်မှာ အမေရန်ကုန်သွားတုန်း Crochet ထိုးတဲ့အပ်ဝယ်လာပေးပါတယ်။ အရမ်းပျော်ပေါ့။ သင်ပေးတဲ့သင်ဆရာတွေက အများကြီးပါ။ ဆေးရုံက Nurse အန်တီတွေ၊ နဲနဲ အသက်ပိုကြီးတဲ့သူငယ်ချင်း ချင်းမလေးတွေ နဲ့ သွားဆရာဝန်အန်တီတစ်ယောက်လည်းပါပါတယ်။ နာမည်တော့မမှတ်မိတော့ပါဘူး။ ပထမဆုံး စထိုးတာကတော့ အဖွားအတွက် သဘက်ကလေးပါ။ အဖွားကလည်း အရမ်းသဘောကျတာပေါ့။ ပထမဆုံးလက်ရာဟာသူ့အတွက်ဖြစ်လို့လေ။ အဲဒီတောက်လျောက် အဆင်ပြေရင်ပြေသလို (စိတ်ဝင်စားတဲ့အချိန်မှပါ၊ များသောအားဖြင့်က စာဖတ်နေတာများပါတယ်) ထိုးလာလိုက်တာ Singapore မထွက်ခင်အထိပါဘဲ။

အဲလောက်နှစ်အကြာကြီးထိုးလာလို့သိပ်ကျွမ်းကျင်တယ်မထင်ပါနဲ့နော်။ ထိုးဖြစ်ရုံပါ။ ဖြစ်ဖြစ်မြောက်မြောက်အင်္ကျီ နှစ်ထည်လားပဲပြီး ပါတယ်။ ကျန်တာတော့ Shawl တွေ၊ TV အုပ်တာ၊ ဆိုဖာနောက်မှီ၊ ပန်းအိုးအောက်ခံ အဲဒါမျိုးလေးတွေပါဘဲ။ လေးထောင့်နဲ့ အဖြောင့်လေးတွေကိုပဲ ကျွမ်းကျွမ်းကျင်ကျင်ထိုးတတ်တာပါ။ ခုလည်းအိမ်က ဆိုဖာအတွက်ထိုးဖြစ်ပါတယ်၊ အရမ်းလွယ်မယ့်အကွက်ကလေးကိုပဲ တမင်ရွေးထိုးထားတာပါ။ လက်တော့ အတော်ညောင်းသား။ နောက်အခွင့်သင့်ရင်တော့ ထိုးဖြစ်ဦးမလားပဲ။ နောက်မှပဲ ဟိုစပ်စပ်၊ဒီစပ်စပ်ဝါသနာပါတဲ့ဟာလေးတွေရေးပြပါဦးမယ်။ အဲလိုဝါသနာပါတတ်လွန်းလို့ အမျိုးသားကဘယ်လိုပြောတယ် ထင်ပါသလဲ Jack of all trades, master of none ပါတဲ့လေ :D